Bojxona yigʻimlari stavkalari tasdiqlandi
10 ming AQSh dollarigacha ekvivalentdagi mahsulotlar uchun BHMning 1 baravari miqdorida toʻlov belgilangan.
“Bojxona yigʻimlari stavkalarini tasdiqlash toʻgʻrisida”gi Hukumat qarori (55-son, 31.01.2025 y.) qabul qilindi.
Qarorga koʻra, quyidagilarni nazarda tutuvchi Bojxona yigʻimlari stavkalari tasdiqlandi:
-tovarlarning bojxona rasmiylashtiruvi uchun yigʻimlar miqdorini bojxona organlari tomonidan harakatlarni amalga oshirish bilan bogʻliq boʻlgan xarajatlarning taxminiy qiymatidan kelib chiqib belgilash;
-tovarlarni “eksport” va “import” bojxona rejimlariga rasmiylashtirish uchun undiriladigan bojxona yigʻimlari stavkalarini oʻzaro muvofiqlashtirish.
Jumladan, 10 ming AQSh dollarigacha ekvivalentdagi mahsulotlar uchun BHMning 1 baravari, 10-20 ming dollargacha BHMning 1,5 baravari, 1 mln dollar va undan ortiq miqdor uuchun 25 baravar yigʻim olinadi.
Bojxona hududida va bojxona hududidan tashqarida bojxona qayta ishlash rejimlarida undiriladigan yigʻim stavkasi ikki baravar kamaytirildi.
Qaror rasmiy eʼlon qilingan kundan boshlab uch oy oʻtgach kuchga kiradi.
