Qashqadaryoda “Hisorak” kichik GES ishga tushirildi
Natijada 7300 ta xonadonni tok bilan taʼminlash rejalashtirilgan.
Bugun, 30 yanvar kuni Qashqadaryo viloyati Shahrisabz tumanida “Hisorak” suv ombori qoshida yangidan barpo etilgan “Hisorak” kichik GESning rasmiy ochilishi boʻlib oʻtdi.
“Hisorak” kichik GES “Oʻzbekgidroyenergo” AJ tomonidan Shahrisabz tumani iqtisodiy-ijtimoiy rivoji hamda mahalliy aholi farovonligi uchun qurilgan boʻlib, energetik quvvati 3,5 MVtga teng, yiliga oʻrtacha 17,5 mln kVt soat elektr energiyasi ishlab chiqaradi.
Kichik GES toʻliq mahalliylashtirish doirasida qurildi. GESning loyihaviy qiymati 1,5 mln dollarga teng. Yangi GESda 6 ta ish oʻrni yaratildi. GES faoliyati tufayli yiliga oʻrtacha 5 mln m3 tabiiy gaz iqtisod qilinadi.
Ishga tushirilgan mazkur GES tomonidan ishlab chiqariladigan elektr energiya 7300 ta xonadonni tok bilan taʼminlaydi.