Surxondaryoda hokim yordamchisi 4,5 mln soʻm bilan ushlandi
U fuqarolardan biriga imtiyozli kredit olib berish evaziga pul talab qilgan.
Surxondaryo viloyati Qiziriq tumanida fuqaroga imtiyozli kredit olib berish evaziga pul talab qilgan hokim yordamchisiga sud hukmi oʻqildi.
"Zamon" dasturiga koʻra, tumandagi Yakkaterak MFYda ishlagan hokim yordamchisi fuqaroga 33 mln soʻmlik imtiyozli kreditdan ikki marta (jami 66 mln soʻm) olib berishni vaʼda qilgan.
Buning evaziga undan 4,5 mln soʻm olgan.
Huquqni muhofaza qilish organlari oʻtkazgan tadbirda hokim yordamchisi tumandagi maʼmuriy binolardan birida ashyoviy dalillar bilan qoʻlga olindi.
Jinoyat ishlari boʻyicha Qiziriq tumani sudi hukmiga koʻra, ayblanuvchiga JKning 45-moddasini qoʻllanib, 168-moddasi 3-qismi "v" bandi bilan 2 yilga ahloq tuzatish ishlari jazosi qoʻllanildi. Shuningdek, u rahbarlik va moddiy javobgarlik talab etiladigan lavozimlarida ishlay olmaydi va daromadining 20 foizi ushlab qolinadi.