Malayziyalik ulamolar Oʻzbekistondagi diniy islohotlarni eʼtirof etdi
Uchrashuvda Imom Moturidiy, Imom Buxoriy xalqaro ilmiy-tadqiqot markazlari vakillari, Malayziya islomni anglash instituti direktori qatnashdi.
Oʻzbekistonning bir guruh islomshunos olimlari Malayziyaga tashrifi doirasida Malayziya islomni anglash institutida uchrashuv tashkil etildi.
Unda Imom Moturidiy, Imom Buxoriy xalqaro ilmiy-tadqiqot markazlari vakillari, Malayziya islomni anglash instituti direktori Muhammad Aʼzam bin Muhammad Odil va institut masʼullari ishtirok etdi.
Uchrashuvda Malayziya va Oʻzbekistonning diniy-maʼrifiy yoʻnalishdagi taʼlim va ilmiy-tadqiqot muassasalari oʻrtasidagi hamkorlik masalalari muhokama qilindi.
Malayziya islomni anglash instituti direktori Muhammad Aʼzam bin Muhammad Odil soʻnggi yillarda Oʻzbekiston prezidenti Shavkat Mirziyoyev tashabbusi bilan diniy sohada keng koʻlamli islohotlar amalga oshirilgani, bu ijobiy oʻzgarishlarni butun dunyo hamjamiyati kabi Malayziyadagi ilmiy doiralar ham xursandchilik bilan qabul qilayotganini alohida taʼkidladi.