Boʻzatov FEST tanlovi gʻolibi “Oʻzbekistonda xizmat koʻrsatgan artist” unvoni bilan taqdirlandi

2019 yil Qoraqalpogʻiston Respublikasida Boʻzatov tumani tashkil etilgan. 2020 yil esa Prezident Shavkat Mirziyoyev qoraqalpogʻistonlik yoshlar bilan muloqot chogʻida yosh isteʼdod egalari mana shu goʻzal maskanga kelib, tumanning obroʻsini va dovrugʻini butun dunyoga tanitish uchun “Yoshlar ovozi” – Boʻzatov FEST tanlovini oʻtkazish tashabbusini ilgari surgandi.

Davlat rahbarining tashabbusidan soʻng, 2021 yildan boshlab Yoshlar ishlari agentligi va hamkor tashkilotlar ushbu tanlovni oʻtkazishi anʼanaga aylandi. Tanlov baxshchilik, anʼanaviy ijro, opera va estrada yoʻnalishlari boʻyicha mahalladan boshlanib, sektor, tuman, viloyat va respublika bosqichlarida oʻtkaziladi.

Bugungacha Boʻzatov FEST koʻplab istaʼdod egalarini kashf etdi. Ulardan biri – Otabek Nazirovdir. U tanlovning 2024 yilgi mavsumida 23-30 yosh toifasi boʻyicha opera yoʻnalishida 1-oʻrinni qoʻlga kiritgan.

Otabek Nazirovning finaldagi ishtiroki:

25 yanvar kuni Prezident Farmoniga asosan “Yoshlar ovozi” – Boʻzatov FEST tanlovi gʻolibi Nazirov Otabek Baxadir oʻgʻli “Oʻzbekistonda xizmat koʻrsatgan artist” faxriy unvoni bilan taqdirlandi.

Boʻzatov yulduzlari: Otabek Nazirov

Bu loyiha yoshlarga nima beryapti?

Birinchidan, tanlovning ilk bosqichi butun respublikada mavjud har bitta mahallada oʻtkaziladi. Yaʼni eng chekka hududdagi yosh ham, eng markazdagisi ham eʼtibordan chetda qolmaydi – barcha yigit-qizlar qatnashishiga teng imkoniyat yaratilgan.

Ikkinchidan, munosib ragʻbat. Tanlovda har bir yoʻnalish va yosh toifasida respublika bosqichida 1-oʻringa 50 mln soʻm, 2-oʻringa 30 mln soʻm hamda 3-oʻringa 20 mln soʻm pul mukofoti topshiriladi. Qolgan barcha respublika bosqichi ishtirokchilari esa 10 mln soʻmdan pul mukofoti bilan ragʻbatlantiriladi.

Uchinchidan, xalqaro maydonga chiqish koʻprigi vazifasini oʻtayapti. Masalan, “Boʻzatov yoshlar ovozi 2022 yil” tanlovida 1-oʻrinni qoʻlga kiritgan 12 nafar iqtidorli yosh 2023 yil 17-28 may kunlari Italiya davlatida malaka oshirib, “Oʻzbekiston madaniyati” haftaligida konsert dasturlari bilan ishtirok etishdi.

Bundan tashqari, tanlovining 2024 yilgi respublika bosqichida 10-15 yosh toifasida 1-oʻrinni qoʻlga kiritgan Yasmina Husniddinova Belarusda oʻtkazilgan XXII “VITEBSK–2024” Xalqaro bolalar musiqa tanlovida gran-prini qoʻlga kiritdi.

Toʻrtinchidan, butun Oʻzbekiston oldida shu tanlov orqali oʻz isteʼdodini koʻrsatgan, respublika bosqichida gʻolib boʻlgan yoshlardan bugungi kunga qadar, 1 nafari “Shuhrat” medali, 3 nafari “Kelajak bunyodkori” medali, 2 nafari “Nihol” mukofoti bilan taqdirlandi.

Bir soʻz bilan aytganda, Boʻzatov isteʼdodlarni kashf etadi!