Transportda belgilangan yoʻl haqi tariflarini asossiz oshirish javobgarlikka sabab boʻladi
Temir yoʻl transporti va metropolitenda haydovchining mehnat va dam olish rejimini buzish uchun ham javobgarlik belgilanmoqda.
Qonunchilik palatasi majlisida transport sohasida davlat nazoratini takomillashtirishga qaratilgan qonun loyihasi koʻrib chiqildi.
Ushbu qonun loyihasi bilan Maʼmuriy javobgarlik toʻgʻrisidagi kodeksga temir yoʻl transporti va metropolitenda yuk va yoʻlovchilar tashish xavfsizligi qoidalarini buzish, haydovchilarining mehnat va dam olish rejimini nazorat qiluvchi nosoz qurilmadan (taxografdan) foydalanish, haydovchining mehnat va dam olish rejimini buzish uchun javobgarlik belgilanmoqda.
Shu bilan birga, avtomobil transportida yoʻlovchilarni muntazam yoʻnalishlarda tashish huquqini tasdiqlovchi guvohnomasiz yoʻlovchi tashish javobgarlikka sabab boʻladi.
Bundan tashqari belgilangan yoʻl haqi tariflarini oshirish, muntazam yoʻnalish boʻyicha tasdiqlangan qatnov jadvaliga amal qilmaslik, belgilangan harakat hamda yuk bilan yoki yuksiz holdagi gabarit oʻlchamlari, shuningdek, umumiy haqiqiy vazni, oʻqqa tushuvchi ogʻirligi belgilangan normalardan oshirgan holda yoʻlga va ruxsatnomada koʻrsatilgan harakat yoʻnalishidan chetga chiqish uchun javobgarlik nazarda tutilmoqda.