Ilon Maskning Starship raketasi sinov paytida portlab ketdi
Halokatga "kislorod yoki yoqilgʻi sizib chiqishi" sabab boʻlganligi taxmin qilinmoqda.
Space X kompaniyasining yettinchi Starship kemasi sinov paytida portlab ketdi.
Starship raketasi Texasdan uchirilganidan bir necha daqiqa oʻtib fazoda parchalanib ketdi, deyiladi Ilon Maskning SpaceX kompaniyasi bayonotida.
Kompaniyaning X (sobiq Twitter) ijtimoiy tarmogʻida eʼlon qilingan xabarga koʻra, Hind okeani uzra nazorat ostida harakat qilishi kerak boʻlgan Starship balandlikka koʻtarilayotganda havoda portlab ketgan.
Mask tushuntirganidek, halokatga "kislorod yoki yoqilgʻi sizib chiqishi" sabab boʻlishi mumkin.
Space X ikkinchi marta kuchaytirilgan uchirish minorasi yordamida oʻta ogʻir raketani Yerga muvaffaqiyatli qaytardi.
"Muvaffaqiyat noaniq, ammo zavqlanish kafolatlangan!" — deb yozdi Mask X sahifasida osmonda olovli iz aks etgan videoni ulashgan holda.
Missiya Jeff Bezosning Blue Origin kompaniyasi raketasi boʻlgan New Glenn'ning birinchi parvozidan bir necha soat oʻtib amalga oshirildi. U birinchi marta orbitaga raketa uchirdi, biroq qurilmani okean platformasiga qoʻndira olmadi.
