Moliyaviy mustaqil OTMlarning "Tashabbusli byudjet"da qatnashishi taqiqlanadi
Loyiha doirasida tashkilotlar tomonidan barcha turdagi avtomobillar, radarlar va rahbar xodimlar uchun mebel xarid qilishga ruxsat berilmaydi.
"Tashabbusli byudjet" jarayonini oʻtkazish boʻyicha amaldagi tartibga tegishli oʻzgartirishlar kiritildi. Bu haqda Oliy Majlis Senatining qarorida maʼlum qilingan.
Unga koʻra, har yili tuman va shahar byudjetidan 10 tadan kam boʻlmagan, koʻpi bilan 30 ta loyiha uchun yetarli mablagʻ ajratilishi belgilandi. Bunda 10 tadan ortiq loyiha uchun mablagʻlar tuman yoki shahar aholisining tegishli hududdagi ulushidan kelib chiqib taqsimlanadi.
Hozirgi kunda loyihalarning eng yuqori chegaraviy qiymati 1,5 mlrd soʻmni tashkil etadi. Shunga koʻra, tuman va shahar byudjetidan ajratiladigan mablagʻlarning eng kam miqdori 15 mlrd soʻm, eng yuqori miqdori esa 45 mlrd soʻm etib belgilandi.
Loyiha doirasida tashkilotlar tomonidan barcha turdagi avtomobillar, jamoat xavfsizligini taʼminlashga oid jihozlar (radar, jamoat joylaridagi kuzatuv kameralari, "svetofor"), rahbar xodimlar uchun mebel jihozlarini xarid qilish taqiqlanadi.
Bundan tashqari, joriy yildan moliyaviy mustaqil boʻlgan oliy taʼlim muassasalari "Tashabbusli byudjet"da ishtirok etmaydi.