Istanbulda olti oʻzbekistonlik spirtli ichimlikdan zaharlanib vafot etdi
Mazkur ish doirasida ikki nafar Turkmaniston fuqarosi qoʻlga olindi.
Istanbuldagi zaharlanishda 6 nafar oʻzbekistonlik vafot etdi. Bu haqda Oʻzbekiston konsulxonasi xabar berdi.
2025 yil 14 yanvar kuni Istanbul shahridagi Bosh konsulxonaga qoʻlbola spirtli ichimlik isteʼmoli oqibatida zaharlanib vafot etgan fuqarolarning yaqinlari murojaat qilgan.
Ushbu noxush holatlar Istanbul shahrining Aksaray tumanida sotib olingan spirtli ichimlik isteʼmoli oqibatida yuzaga kelgan.
Vafot etgan fuqarolar asosan 35–40 yoshdagi erkaklar va bir nafar ayoldir.
Qalbaki spirtli ichimliklarni tayyorlash hamda tarqatish bilan shugʻullangan ikki nafar Turkmaniston fuqarosi Istanbul shahrida qoʻlga olindi.
Olingan maʼlumotlariga koʻra, soʻnggi sutka ichida Istanbul shahrida jami 38 kishi soxta spirtli ichimlik isteʼmoli oqibatida zaharlangan. Kasalxonaga murojaat qilganlarning 11 nafari hayotdan koʻz yumgan.
Politsiya voqea yuzasidan keng qamrovli tergov ishlarini boshladi.
Maʼlum boʻlishicha, shifoxonaga murojaat qilganlarning 26 nafari xorijliklardir.