Los-Anjelesda favqulodda holat eʼlon qilindi
Shahar gʻarbidagi kuchli oʻrmon yongʻinlari sabab vaziyat keskinlashmoqda, 10 mingdan oshiq uy xavf ostida qoldi.
Kaliforniya shtati maʼmuriyati Los-Anjeles gʻarbidagi baʼzi hududlarni qamrab olgan oʻrmon yongʻinlari sababli favqulodda holat eʼlon qildi.
Aholiga evakuatsiya choralarini koʻrish buyurilgan.
Oʻt oʻchiruvchilar yongʻinlarni oʻchirish uchun vertolyotlardan foydalanadilar.
Palisades hududidagi evakuatsiya zonasida 30 mingga yaqin odam istiqomat qiladi. Matbuot anjumanida mahalliy rasmiylar 10 mingga yaqin uy xavf ostida ekanligini aytdi.
Rasmiylar kuchli shamol haqida ham ogohlantirmoqda.
Kaliforniya gubernatori Gevin Nyusomning aytishicha, koʻplab binolar allaqachon yongʻin natijasida vayron boʻlgan.
Los-Anjeles oʻt oʻchirish xizmati boshligʻi Kristin Kroulining aytishicha, tartibsiz evakuatsiyaga qaramay, hech qanday jabrlanganlar yoʻq.
Koʻplab shahar aholisi avtomobillarini yoʻlda tashlab ketishgan.
AQSh prezidenti Jo Bayden boʻlayotgan voqealardan xabardor boʻlib, shtat va mahalliy rasmiylar bilan aloqada, deya xabar bermoqda CNN Oq uyga asoslanib.
Rasmiylar yongʻinlar shamol tufayli kuchayishi mumkinligidan ogohlantirmoqda.
Milliy ob-havo xizmati baʼzi hududlarda tezligi soatiga 100 milgacha boʻlgan shamol kutilayotganini aytdi.
Yuqori darajadagi ogohlantirish 9 yanvar kuniga qadar davom etishi kutilmoqda.
