Ilhom Aliyev Armanistonni Janubiy Kavkazdagi xavf manbai deb atadi
Ozarbayjon rahbari Yerevanni qurollantirayotgan davlatlarga (jumladan Fransiya) ham murojaat qilgan.
Ozarbayjon prezidenti Ilhom Aliyev Armanistonni Janubiy Kavkaz uchun tahdid manbai ekanini aytdi.
“Armanistonni qurollantirish faqat yangi keskinlikka olib keladi, biz Armanistonning aslida mintaqa uchun tahdid manbai boʻlishini xohlamaymiz”, dedi Aliyev Ozarbayjon telekanallariga bergan intervyusida.
Uning soʻzlariga koʻra, Yerevan Ozarbayjon Armaniston uchun xavf manbai emasligini tushunishi kerak.
"Biz Janubiy Kavkazda tinchlik va hamkorlik boʻlishini istaymiz, ular bizning ishlarga aralashmasin. Ular Turkiya va Ozarbayjon oʻrtasida geografik toʻsiq boʻlmasliklari kerak. Zangezur yoʻlagi ochiq boʻlishi kerak va shunday boʻladi. Ular buni qanchalik tezroq tushunishadi, shuncha yaxshi", - deya qoʻshimcha qildi Ozarbayjon prezidenti.
Aliyev Armaniston qurollanishni zudlik bilan toʻxtatishi kerakligini ham aytdi.
"Fransiya va unga qurol yetkazib beruvchi boshqa davlatlar bu shartnomalarni bekor qilishlari kerak, bu bizning shartimiz", dedi u.
Tinchlik shartnomasi boʻyicha muzokaralarning borishi haqida Aliyev, Yerevan Boku shartlarini qabul qilishiga umid bildirdi. "Chunki ularda hech qanday favqulodda narsa yoʻq, Minsk guruhini bekor qilish, konstitutsiyani oʻzgartirish busiz tinchlik shartnomasi mumkin emas", dedi Ozarbayjon prezidenti.
Uning qoʻshimcha qilishicha, Armanistonga tinchlik shartnomasi kerak boʻlmasa, Ozarbayjonga ham kerak emas.