Vazirlik va hokimliklarga turli xarajatlarni qisqartirish topshirigʻi berildi
Davlat organlariga mahalliy byudjetlarning qoʻshimcha manbalari hisobidan boshqaruv xodimlarining ish haqini oshirish, xizmat avtomobillarini sotib olish va boshqalarga taqiq qoʻyilmoqda.
Oʻzbekistondagi vazirlik, idora va hokimliklarga 2025 yilda byudjet mablagʻlarini tejash va samaradorligini oshirish choralarini koʻrish topshirigʻi berildi.
Bu haqda prezidentning 25 dekabrdagi "Davlat byudjetining 2025 yil ijrosini taʼminlash chora-tadbirlari toʻgʻrisida"gi qarorida nazarda tutilgan.
Byudjet taqchilligining cheklangan darajasidan oshib ketishiga olib kelishi mumkin boʻlgan qoʻshimcha xarajatlarga (bu yil yalpi ichki mahsulotga nisbatan 3 foiz miqdorida belgilangan) faqat qoʻshimcha daromadlar mavjud boʻlganda yoki xarajatlarning boshqa bandlarini qisqartirish hisobiga ruxsat beriladi.
Shu bilan birga, davlat organlariga mahalliy byudjetlarning qoʻshimcha manbalari hisobidan boshqaruv xodimlarining ish haqini oshirish (eng kam ish haqini oshirishdan tashqari), xizmat avtomobillarini sotib olish (maxsus transport vositalaridan tashqari), qimmatbaho yumshoq mebel va ofis jihozlarini sotib olish (bundan taʼlim, sogʻliqni saqlash, qishloq va suv xoʻjaligi sohalari mustasno) boʻyicha takliflar kiritish taqiqlanadi.
Vazirlik va idoralarning byudjetdan tashqari mablagʻlaridan xizmat avtomobillari, qimmatbaho mebel va ofis jihozlarini xarid qilish faqat Vazirlar Mahkamasining roziligi bilan amalga oshirilishi mumkin.
Byudjet tashkilotlarining 2025 yilga moʻljallangan xarajatlar smetasini tuzishda mebel va ofis jihozlari xarajatlari 2024 yilga nisbatan 10 foizga qisqartirilishi kerak (taʼlim va tibbiyot muassasalaridan tashqari).
Hokimliklarga byudjet xarajatlari parametrlarini shakllantirishda ish haqi, dori-darmon, oziq-ovqat va kommunal xizmatlar uchun mablagʻlar yetishmasligiga yoʻl qoʻyish taqiqlanadi.
Shuningdek, ularga mahalliy byudjetlar va ularning qoʻshimcha manbalari hisobidan normativ-huquqiy baza bilan mustahkamlanmagan qoʻshimcha shtat birliklarini tashkil etish taqiqlandi.
Tadbirlarni moliyalashtirishning aniq manbaisiz oʻtkazishga yoʻl qoʻyilmaydi.
2025 yil 1 yanvardan tuman va shahar darajasidagi sogʻliqni saqlash muassasalarini saqlash xarajatlari Qoraqalpogʻiston Respublikasi byudjeti, viloyatlar byudjetlari va Toshkent shahri byudjetidan moliyalashtirishga oʻtkaziladi.
Tumanlar va shaharlar byudjetlari tasdiqlangan ilovalarga muvofiq xarajatlar yoʻnalishlari boʻyicha shakllantiriladi.
Eslatib oʻtamiz, 2024 yil 18 dekabrda Senat davlat byudjeti boʻyicha qonunni maʼqullagandi. 2025 yilda konsolidatsiyalashgan byudjet daromadlari 431,0 trln soʻm, xarajatlar esa 480,5 trln soʻm miqdorida shakllantirilgan.
Yanvar oyi boshida esa prezidentga qonun toʻgʻrisida axborot berilgandi.
