Toshkentda yana ikki shaxs ozodlikdan mahrum etildi
Ular oʻtgan yili "Dolzarb 40 kunlik" doirasida ushlangan.
Poytaxtda "Dolzarb 40 kunlik" doirasida qoʻlga olingan yana ikki shaxs qamaldi.
Toshkent shahar IIBB tomonidan qoʻzgʻatilib tergov qilingan jinoyat ishi boʻyicha tergov harakatlari yakunlanib, jinoyat ishi ayblov xulosasi bilan sudga yuborilgan.
Jinoyat ishlari boʻyicha Mirzo Ulugʻbek tumani sudining 24 aprel kunidagi hukmiga koʻra 1985 yilda tugʻilgan Fayziyev Alibek Shaxrulloyevich Jinoyat kodeksining 28,246-moddasi 2-qismi va 25,273-moddasi 5-qismi bilan aybli deb topilgan. Sud tomonidan unga nisbatan oʻn ikki yil muddatga ozodlikdan mahrum qilish jazosi tayinlangan.
Shuningdek, Jinoyat ishlari boʻyicha Yakkasaroy tumani sudining 14 may kunidagi hukmiga koʻra, 1990 yilda tugʻilgan Amonov Olimjon Shuhratovich Jinoyat kodeksining 276-moddasi 2-qismi "a" bandi bilan aybli deb topilgan. Sud tomonidan unga nisbatan toʻrt yil muddatga ozodlikdan mahrum qilish jazosi tayinlangan.
Avvalroq “Boxo zavxoz” va “Terminator” laqablari bilan tanilgan Bahodir Sultonov hamda Navoiydagi avtosalon direktori Niyoz Ibodovga jazo tayinlangandi.
