IIV aholini terrorchilikka chaqiriqlar boʻyicha ogohlantirdi
Eng xavfli jihati shuki, ushbu shaxslarning xabarlari koʻp hollarda bolalarga yuborilmoqda.
Ichki ishlar vazirligi terrorchilik xurujlari boʻyicha tarqalgan chaqiriqlar haqida ogohlantirish bilan chiqdi.
"Oxirgi vaqtlarda respublikamiz hamda qoʻshni davlatlar fuqarolariga internet ijtimoiy tarmoqlari orqali pul mukofoti evaziga savdo va koʻngilochar markazlar, maktablar va boshqa jamoat joylarini minalashtirish taklif qilingan xabarlar kelib tushmoqda" deyiladi xabarda.
Eng xavfli jihati shuki, yovuz niyatli shaxslarning xabarlari koʻp hollarda bolalarga yuborilmoqda. Shuningdek bolalarning shaxsiy maʼlumotlari orqali ularni qoʻrqitish holatlari kuzatilmoqda.
"Agarda Sizga bu kabi xabarlar kelib tushsa vahimaga tushmang va ularni ochiq chatlar, tanishlaringiz va doʻstlaringizga yubormay, darhol" 102" raqamiga qoʻngʻiroq qilib, ichki ishlar organlariga xabar bering. Xabar yuboruvchilarni bloklang va ular bilan yozishma va suhbatga kirishmang", deya taʼkidlanadi vazirlik xabarida.
Eslatib oʻtamiz, 22 mart kuni Moskva viloyatida konsert zalida sodir boʻlgan teraktda 144 kishi halok boʻldi. Ushbu hodisadan keyin Toshkentdagi jamoat joylarida xavfsizlik choralari kuchaytirildi.