Tataristonga ilk bor Ukraina dronlari hujum qildi
Oʻtgan yili AQSh nashrlari Rossiya Eron bilan hamkorlikda Tataristonda dron zavodi qurishni reja qilgani haqida yozgandi.
Dronlar Tatariston respublikasidagi Yelabuga va Nijnekamskdagi korxonalarga hujum qildi, bir necha kishi jarohatlandi, biroq jiddiy zarar yoʻq, deb yozadi "TASS" respublika rahbari matbuot xizmatiga tayanib.
Texnologik jarayon buzilmagan, deb yozadi "RIA Novosti" rasmiylar bayonotiga asoslanib.
Bu urush boshlangandan buyon ukrain dronlarining Tatariston hududiga ilk hujumi sanaladi. Ukraina chegarasidan Tataristongach qariyb 1,2 ming kilometrni tashkil etadi.
Mart oyida Ukraina Qurolli kuchlari Rossiya neftni qayta ishlash zavodlariga, shuningdek, boshqa sanoat obʼektlariga uchuvchisiz samolyotlar bilan hujumlar sonini oshirgan.
Oʻtgan yili Washington Post gazetasi Rossiya Yelabugadagi zavodda Eron modelidagi dronlarni ishlab chiqarishni yoʻlga qoʻymoqchiligi haqida xabar bergan edi.
2023 yilning fevralida Wall Street Journal gazetasi AQSh ittifoqchilaridan birining nomi oshkor etilmagan rasmiylariga tayanib, Moskva va Tehron Rossiyada Ukrainadagi urush uchun kamida 6 mingta uchuvchisiz uchoqlarni ishlab chiqaradigan yangi zavod qurish rejalarini ishlab chiqayotgani haqida xabar berdi.
