Oʻzbekiston elchixonasi Isroilda boʻlib turgan fuqarolarni ogohlantirdi
Eslatib oʻtamiz, soʻnggi voqealar fonida Eron va Isroil qarama-qarshiligi kuchaymoqda.
Oʻzbekistonning Isroildagi elchixonasi murojaat bilan chiqdi. Unda fuqarolar ogohlikka chaqirilgan.
"Oʻzbekistonning Isroildagi elchixonasi mintaqadagi vaziyat tufayli Isroil hududida boʻlib turgan fuqarolardan ehtiyotkorlik va xavfsizlik chora-tadbirlarini koʻrish hamda doimiy ravishda hushyorlik zarurligini eslatadi.
Ushbu ziddiyatli kunlarda shaxsiy xavfsizlikka tahdid solishi mumkin boʻlgan holatlarni oldini olish uchun zaruratsiz yashab turgan joyingizni tark etmaslikni tavsiya qilamiz", deyiladi xabarda.
Eslatib oʻtamiz, 2023 yil 7 oktabrdan buyon Isroil armiyasi Gʻazoda urush olib bormoqda. Oqibatda 30 mingdan oshiq falastinlik qurbon boʻldi.
1 aprel sanasida Isroil Eronning Suriyadagi konsulligida zarba berdi, oqibatda generallar va ofitserlar halok boʻldi. Eron Isroilga javob berishini maʼlum qildi.
Oʻz navbatida Isroil Eron hujum qiladigan boʻlsa, mamlakatning yadro obʼektlarini nishonga olishi mumkinligi haqida xabarlar tarqaldi.
