Pokistonning Afgʻonistonga zarbasi oqibatida sakkiz kishi halok boʻldi
"Tolibon" hujumni qatʼiy qoralab, suverenitetni buzish deya baholadi.
"Tolibon" harakati Pokiston Afgʻoniston hududiga ikkita havo hujumi uyushtirgani haqida xabar berdi. Natijada sakkiz kishi halok boʻlgan, ular ayollar va bolalardir.
Bu haqda Reuters agentligi xabar bermoqda.
"Tolibon" vakili Zabihulloh Mujohid: “Soat 3:00 atrofida Pokiston samolyotlari Pokiston bilan chegaraga yaqin Xost va Paktika viloyatlarida tinch aholi uylarini bombardimon qildi" deya bayonot bergan.
Mamlakat hukumati matbuot kotibi zarbalarni "qatʼiy" qoralab, buni mamlakat suverenitetini buzish deb atadi. Pokiston armiyasi va tashqi ishlar vazirligi Reuters agentligining izoh soʻrab qilgan murojaatiga javob bermadi.
Zarbalar 17 mart kuni Pokistonga uyushtirilgan hujumda yetti nafar pokistonlik harbiy halok boʻlganidan keyin berilgan.
Hujum Afgʻonistondan amalga oshirilgan. Pokiston prezidenti Osif Ali Zardoriy hujum uchun qasos olishga vaʼda bergandi.