Isroil Oʻzbekistonning JSTga aʼzo boʻlishini ratifikatsiya qildi
Isroil iqtisodiyot vaziri Nir Barkat Oʻzbekiston bosh vaziri oʻrinbosari Jamshid Xodjayev BAAda oʻzaro uchrashuv oʻtkazgan.
Isroil Oʻzbekistonning JSTga aʼzoligini ratifikatsiya qildi. Bu haqda Oʻzbekistonning Isroildagi elchixonasi X tarmogʻidagi sahifasida xabar berdi.
BAAda boʻlib oʻtayotgan Jahon savdo tashkilotining konferensiyasi doirasida tegishli hujjatni Isroil iqtisodiyot vaziri Nir Barkat Oʻzbekiston bosh vaziri oʻrinbosari Jamshid Xodjayev bilan uchrashuvda imzoladi.
Maʼlumot uchun, JSTga aʼzo boʻlish uchun barcha aʼzo davlatlarning roziligi kerak. JSTga aʼzolik Oʻzbekistonga keng imkoniyatlar eshiklarini ochadi, mamlakat 164 ta davlat bilan teng huquqli asosda savdo qilish imkonini qoʻlga kiritadi.
Eslatib oʻtamiz, ikki kun avval prezident Shavkat Mirziyoyev oʻtkazgan yigʻilishda ham JSTga aʼzolik masalasi koʻtarilgandi. Unda Jahon savdo tashkiloti bilan samarali hamkorlik qilish maqsadida Savdodagi texnik toʻsiqlar boʻyicha axborot markazini ishga tushirish taklif qilingandi.