Shavkat Mirziyoyev yozda Qozogʻistonga boradi

Qozogʻiston joriy yilning avgust oyida Shavkat Mirziyoyevning tashrifini kutmoqda.

Bu haqda Qozogʻiston Majilisi Xalqaro ishlar, mudofaa va xavfsizlik qoʻmitasi raisi Aygul Kuspan maʼlum qildi. Uning aytishicha, ertaga, 28 fevral kuni Qozogʻiston Oʻzbekiston bilan ittifoqchilik munosabatlari toʻgʻrisidagi shartnoma ratifikatsiya qiladi.

Kelishuvga koʻra, Qozogʻiston va Oʻzbekiston oʻrtasida hamkorlikning yangi mexanizmi – Davlat rahbarlari darajasidagi Oliy davlatlararo kengash yaratilmoqda. Ushbu Kengash ishi Tashqi ishlar vazirlari kengashi tomonidan muvofiqlashtiriladi.

– Birinchi uchrashuv Oʻzbekiston Prezidenti Shavkat Mirziyoyevning davlat tashrifi doirasida joriy yilning 8 avgust kuni Ostona shahrida oʻtkazilishi rejalashtirilgan, – deydi Aygul Kuspan.

Avvalroq ikki davlat oʻzaro migratsiya qoidalarini yumshatgan edi.