Isroil hujumi oqibatida birdaniga besh jurnalist halok boʻldi
Halok boʻlganlar Quds News Network telekanali xodimlaridir.
Gʻazo sektorida Isroil harbiylarining hujumi oqibatida kamida besh nafar falastinlik jurnalist halok boʻldi. Bu haqda "Al-Jazira" telekanali xabar berdi.
Teleradiokompaniyaning veb-saytida eʼlon qilingan xabarda, Isroil armiyasi Quds News Network telekanali uchun sunʼiy yoʻldosh orqali koʻrsatuvlar olib borgan mashinaga hujum qilgani koʻrsatilgan.
Jurnalistlar Nuseyrat qochqinlar lageridagi Al-Avda shifoxonasi darvozasi oldida turgan.
Telekanal oʻzining kamida besh nafar xodimi – Fadi Hassouna, Ibrohim al-Shayx Ali, Muhammad al-Lada, Faysal Abu al-Kumsan va Ayman al-Jadiy halok boʻlganini tasdiqladi.
Avvalroq Jurnalistlarni himoya qilish qoʻmitasi (CPJ) bosh direktori Jodi Ginsberg 2024 yilda dunyoda kamida 95 nafar jurnalist va OAV xodimlari halok boʻlganini maʼlum qilgandi.