Oʻzbekiston 1 yanvardan BRIKSga hamkor davlat maqomini oladi
Yangi hamkor davlatlar roʻyxatida Qozogʻiston, Belarus, Boliviya, Indoneziya, Kuba, Malayziya, Tailand va Uganda kabi davlatlar ham bor.
2025 yil 1 yanvardan Oʻzbekiston va Qozogʻiston rasman BRIKS boʻyicha hamkor davlatlar maqomini oladi. Bu haqda Rossiya prezidenti yordamchisi Yuriy Ushakov maʼlum qilgan.
Oʻzbekiston va Qozogʻistondan tashqari BRIKS boʻyicha yangi hamkor davlatlar roʻyxatiga Belarus, Boliviya, Indoneziya, Kuba, Malayziya, Tailand va Uganda kiritilgan. Hammasi boʻlib 13 ta davlatga taklifnomalar yuborilgan, Rossiya esa yana toʻrtta davlatdan javob kutmoqda.
BRIKS boʻyicha hamkor davlatlar toifasini yaratish toʻgʻrisidagi qaror 2024 yil oktabr oyida Qozonda boʻlib oʻtgan sammitda qabul qilingan edi.
Ushakovning soʻzlariga koʻra, sammit arafasida assotsiatsiyaga u yoki bu maqomda oʻz faoliyatiga qoʻshilish uchun 35 davlatdan arizalar kelib tushgan.
Hamkor mamlakatlar vakillari BRIKS sammitlari va tashqi ishlar vazirlari yigʻilishlari doirasidagi yakka tartibda uchrashuvlarga, shuningdek, assotsiatsiyaning boshqa tadbirlarida ishtirok etish uchun taklif etiladi.
BRIKS - toʻqqiz davlat: Braziliya, Rossiya, Hindiston, Xitoy, Janubiy Afrika, BAA, Eron, Misr va Efiopiyadan tashkil topgan. Tashkilot 2006 yil iyun oyida tashkil etilgan. Blokning soʻnggi kengayishi 2024 yil 1 yanvarda sodir boʻlgandi.
