Turkiyadagi zavodda portlash sabab 12 kishi halok boʻldi
Ushbu inshootda ov va sport uchun moʻljallangan oʻq-dorilar, fuqarolik maqsadlarida foydalanish uchun portlovchi moddalar ishlab chiqarilgan.
Turkiyada portlovchi moddalar zavodida yuz bergan portlashda 12 kishi halok boʻldi.
Yana kamida uch kishi jarohat oldi, deb xabar bermoqda CNN Turk mahalliy hokimiyat maʼlumotiga asoslanib.
Portlash sabablari hozircha maʼlum emas, biroq, dastlabki maʼlumotlarga koʻra, diversiya haqida gap yoʻq.
Turkiya Adliya vazirligi rahbari Yilmaz Tunch voqea yuzasidan jinoiy ish qoʻzgʻatilgani, tergov harakatlari olib borilayotganini maʼlum qildi.
“Balikesir prokuraturasi voqea yuzasidan keng qamrovli tergov olib bormoqda. Uni olib borish uchun toʻrt nafar prokuror jalb etildi”, — deb yozdi vazir X ijtimoiy tarmogʻida.
Zavod Balikesir viloyatida joylashgan. Portlash mahalliy vaqt bilan 8:25 da sodir boʻlgan. Zavodning portlash sodir boʻlgan qismi qulab tushdi.
Kompaniya veb-saytiga koʻra, zavod boshqa narsalar qatorida oʻq-dorilar, jumladan, ov va sport uchun moʻljallangan oʻq-dorilar, fuqarolik maqsadlarida foydalanish uchun portlovchi moddalar ishlab chiqaradi.