AQSh Davlat departamenti Belarus borasida ogohlantirish bilan chiqdi
AQShning Minskdagi elchixonasi oʻz faoliyatini 2022 yil 28 fevralda toʻxtatgan. Amerikaliklar ushbu mamlakatda ushlansa huquqiy yordam koʻrsatish qiyinlashadi.
AQSh Davlat departamenti oʻz fuqarolariga Belarusga sayohat qilishdan voz kechishni tavsiya qildi, hozirda respublikada boʻlganlar esa darhol uni tark etishi zarur. Bu haqda departament saytida xabar berilgan.
Amerikaliklar "Belarus hukumati mahalliy qonunlarni oʻzboshimchalik bilan qoʻllashi", hibsga olish xavfi, "Belarusning Ukraina bilan mojaroda Rossiyaga yordami", shuningdek, koʻcha tartibsizliklari va chegaralanganligi sababli Belarusga sayohat qilishdan bosh tortishga chaqiriladi. Koʻngilsizlik sodir boʻlgan taqdirda AQSh fuqarolariga elchixonadan yordam koʻrsatish imkoniyatlari yoʻq.
“AQSh fuqarolari favqulodda vaziyat yuzaga kelganda mumkin boʻlgan sayohat rejalarini muntazam ravishda koʻrib chiqishlari kerak. Qoʻshni davlatlar bilan chegara oʻtish joylari baʼzan oldindan ogohlantirmasdan yopiladi. Belarusning Litva, Polsha, Latviya va Ukraina bilan chegaralaridagi nazorat-oʻtkazish punktlari yopilishi mumkin”, — deyiladi Davlat departamenti xabarida.
Departament, shuningdek, agar vatandoshlar Belarusda hibsga olinsa, yordam kafolati yoʻqligi haqida ogohlantirgan.
AQShning Minskdagi elchixonasi oʻz faoliyatini 2022 yil 28 fevralda toʻxtatdi. Keyin Davlat departamenti buyrugʻi bilan elchixona xodimlari evakuatsiya qilindi va xizmatlar koʻrsatish, shu jumladan favqulodda xizmatlar toʻxtatildi.