OAV: Tramp hokimiyatga kelgach Ukrainani qoʻllashda davom etadi
Bundan tashqari AQShning saylangan prezidenti Yevropa davlatlarini mudofaa uchun koʻproq pul ajratishga majburlamoqchi.
AQShning saylangan prezidenti Donald Tramp maʼmuriyati Ukrainani qoʻllab-quvvatlashda davom etadi, deb yozadi Financial Times manbalarga asoslanib.
Nashr suhbatdoshlariga koʻra, bu pozitsiyani Trampning eng yaqin yordamchilari Yevropaning yuqori martabali amaldorlari bilan muzokaralar chogʻida bildirgan.
Bundan tashqari, Tramp jamoasi Yevropa rasmiylariga saylangan prezidentning NATO davlatlaridan mudofaa xarajatlarini oshirishni talab qilish rejalari haqida aytgan.
Tramp YaIMning 3,5 foiziga rozi boʻlishi mumkin. Boshqa manbaga koʻra, bu raqam 5 foizni tashkil etadi. Donald Tramp, shuningdek, "mudofaa xarajatlarining oshishini Qoʻshma Shtatlar bilan savdoning yanada qulay shartlari taklifi bilan aniq bogʻlashni" rejalashtirmoqda, deya qoʻshimcha qildi FT nashri suhbatdoshlari.
NATOning Yevropa aʼzolari Donald Tramp prezidentlikka kelishi arafasida mudofaa xarajatlarini YaIMning 2 foizidan 3 foizigacha oshirishni muhokama qilishmoqda.
Oʻzining birinchi muddatida (2017 yildan 2021 yilgacha) Tramp NATOning ayrim davlatlarini, jumladan Chexiya va Ispaniyani mudofaa xarajatlari koʻrsatkichlaridan ortda qolayotganini tanqid qilgandi.
