Qashqadaryoda rahbar isitish tizimiga ajratilgan qariyb 1 mlrd soʻmni oʻzlashtirib yuborgani aniqlandi
Ijtimoiy muassasaga ajratilgan pul bilan birgalikda 79 tonna koʻmir ham talon-toroj qilingani aytilmoqda.
Qashqadaryoda Koʻkdala tumanida isitish tizimini taʼmirlashda 934,4 mln soʻmni oʻzlashtirgan MChJ rahbari aniqlandi.
Bosh prokuratura huzuridagi Departamentning Koʻkdala tumani boʻlimi tomonidan tergovga qadar tekshiruv oʻtkazilgan.
Unda “S-TH.” MChJ masʼul shaxslari va boshqalar oʻzaro til biriktirgan.
Ular tumandagi ijtimoiy soha obʼektlarining isitish tizimida bajarilgan qurilish-taʼmirlash ishlarida rasmiy hujjatlarga amalda bajarilmagan ishlarni qoʻshib yozish orqali jami 934,4 mln soʻm byudjet mablagʻlarini hamda ushbu ijtimoiy soha obʼektlarini isitish uchun olib kelingan 79 tonna koʻmirni talon-toroj qilganliklari aniqlangan.
Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari oʻtkazilmoqda.