Oʻzbekiston boʻylab 7,2 mlrd soʻmlik tender savdolari bekor qilindi

7 mlrd soʻmdan oshiq tender savdolari bekor qilindi.

Raqobat qoʻmitasi respublikaning hududlarida maxsus axborot portalidagi maʼlumotlarga va murojaatlarga asosan davlat buyurtmachilari tomonidan amalga oshirilgan xaridlarda qonun talablariga rioya qilinganligi yuzasidan muntazam ravishda monitoring olib bormoqda.

Jumladan, Buxoro viloyati Jondor tuman tibbiyot birlashmasining 210 mln soʻmlik; Fargʻona viloyati Quva tuman Tibbiyot birlashmasining 2 ta 340 mln soʻmlik; Andijon viloyatida Andijon davlat tibbiyot instituti akademik litseyining 212 mln soʻmga yaqin; Jizzax viloyati Respublika tez tibbiy yordam markazi Jizzax filialining 318 mln soʻmdan ortiq tenderlarda qonunga rioya etilmagan.

Bundan tashqari, Qoraqalpogʻiston Respublikasida Nukus shahar “Qum ovul” MFYning 257 mln soʻmga yaqin; Sirdaryo viloyatida "Sayxunobod tuman yoʻllardan foydalanish korxonasi" DMning 3 ta 4,2 mlrd soʻmga yaqin; Navoiy viloyatida Navoiy viloyati yoshlar siyosati va sport bosh boshqarmasi tasarrufidagi sportning oʻyin turlari va yengil atletikaga ixtisoslashtirilgan sport maktabining 3 ta 1,1 mlrd soʻmlik; Namangan tumani maktabgacha va maktab taʼlimi boʻlimining 309 mln soʻm ortiq; Toshkent viloyatida Bekobod shahar maktabgacha va maktab taʼlimi boʻlimining 283 mln soʻmga yaqin boʻlgan eng yaxshi takliflarni tanlash savdolarida “Raqobat toʻgʻrisida”gi Qonuni talablariga rioya qilinmaganligi, yaʼni savdolarda raqobatni cheklaydigan yoki cheklashga olib kelishi mumkin boʻlgan harakatlar aniqlangan.

Shuningdek, tahlil qilingan davlat xaridlarida “Davlat xaridlari toʻgʻrisida”gi Qonunning tegishli modda talablari buzilganlik holatlari aniqlandi.

Raqobat qoʻmitasining oʻrganish natijalariga koʻra, yuqoridagi qonunbuzilish holatlarini bartaraf etish maqsadida buyurtmachilar tomonidan tanlov savdolari ixtiyoriy ravishda bekor qilingan, deyiladi qoʻmita xabarida.