“Yuksaklik sari tasodif boʻlmagan 100 ta uchrashuv” kitobining 2-nashri taqdimot qilindi
Mazkur kitob AQShda yashab ijod qilayotgan taniqli aktyor, publitsist Otabek Mahkamov qalamiga mansub boʻlib, muallif ushbu ijodiy loyihadan tushgan mablagʻning bir qismini Oʻzbekistondagi ogʻir kasalliklarga chalingan va dori-darmonga moddiy imkoni boʻlmagan bolalarni davolatish uchun ajratadi.
14 dekabr kuni Yoshlar ijod saroyida AQShda yashab ijod qilayotgan taniqli aktyor, publitsist Otabek Mahkamov qalamiga mansub “Yuksaklik sari tasodif boʻlmagan 100 ta uchrashuv” kitobining 2-nashri taqdimot qilindi.
Ushbu kitob qahramonlari orasida Hillari Klinton, Gordon Ramzi, Antonio Banderas, Devid Kopperfild, Enrike Iglesias, Farrux Zokirov, Daniyel Redkliff kabi mashhur insonlar hamda dunyo miqyosidagi yulduz boʻlmasa-da, koʻpchilikka taniqli shaxslar bor.
Otabek Mahkamov ilk daqiqalardanoq suhbatdoshining eʼtiborini jalb etish, uning yangi, baʼzan kutilmagan jihatlarini ochib berish qobiliyatiga ega. Shu boisdan mazkur kitobda jamlangan tasodif boʻlmagan har bir uchrashuvning oʻziga xos qiziqarli tarixi bor.
Kitob samimiyat bilan yozilgan. U hayot, uning darslar, quvonchlari, fojialari, yoʻqotishlari va gʻalabalari haqida. Undan barcha zamon va xalqlarga xos hazil-mutoyiba, teran mulohazalar, oʻtkir mushohadalar, tarixiy misollar hamda hikmatli soʻzlar ham oʻrin olgan.
“Yuksaklik sari tasodif boʻlmagan 100 ta uchrashuv” kitobining birinchi nashri uch tilda - oʻzbek, rus va ingliz tillarida bosib chiqarilgan edi. Ushbu yangi nashr esa faqatgina oʻzbek va ingliz tillarida chop etildi. Buning sababi shundaki, muallif eʼtiborini aynan oʻzbekzabon yoshlarga qaratishni, oʻzbek yoshlariga koʻplab davlatlarga borib, taniqli insonlar bilan koʻrishib suhbatda boʻlish aql bovar qilmas ish emasligini, bu ularning xam qoʻlidan kelishi mumkinligini koʻrsatib berishni maqsad qilgan. Undan tashqari, bu orqali milliy kontent boyiydi, oʻzbek tili nufuzi va mavqei yanada oshadi.
Otabek Mahkamov ushbu ijodiy loyihadan tushgan mablagʻning bir qismini Oʻzbekistondagi ogʻir kasalliklarga chalingan va dori-darmonga moddiy imkoni boʻlmagan bolalarni davolash uchun ajratishni rejalashtirgan.
Muallif ushbu ijodiy loyihadan tushgan mablagʻning bir qismini Oʻzbekistondagi ogʻir kasalliklarga chalingan va dori-darmonga moddiy imkoni boʻlmagan bolalarni davolash uchun ajratishni rejalashtirgan.
