Sobiq futbolchi Gruziya prezidenti etib saylandi
26 oktabrda boʻlib oʻtgan parlament saylovlari natijalarini tan olmagan muxolifat prezident saylovida qatnashmadi.
Saylov kollegiyasi Mixail Kavelashvilini Gruziya prezidenti etib sayladi.
53 yoshli sobiq futbolchi, "Xalq hokimiyati" partiyasi aʼzosi, hukmron "Gruziya orzusi" partiyasi tomonidan nomzod sifatida koʻrsatildi. U saylovda davlat rahbari lavozimiga yagona daʼvogar boʻlgan va birinchi turda gʻalaba qozongandi.
Hukmron partiya asoschisi va faxriy raisi Bidzina Ivanishvili Kavelashvilini shunday taʼrifladi: "U gruzin kishisining eng yaxshi timsolidir".
26 oktabrda boʻlib oʻtgan parlament saylovlari natijalarini tan olmagan muxolifat nomzodini koʻrsatmadi va saylovda qatnashmadi.
Gruziyaning amaldagi prezidenti Salome Zurabishvili mazkur voqealarga qanday munosabatda ekani hozircha nomaʼlum.
Eslatib oʻtamiz, Gruziyada parlament saylovi natijalari eʼlon qilingandan buyon namoyishlar tinmayapti.