Maʼnaviy ekspertiza boʻyicha qaror bekor qilindi
Qarorda jismoniy va yuridik shaxslarning huquq va qonuniy manfaatlariga daxl qiluvchi umummajburiy kuchga ega boʻlgan huquqiy normalar belgilanganligi aniqlangan.
Media mahsulotlarni "maʼnaviy ekspertiza"dan oʻtkazishni joriy etish toʻgʻrisidagi qaror bekor qilindi. Bu haqda Adliya vazirligi matbuot xizmati xabar berdi.
Ijtimoiy tarmoqlarda media mahsulotlarini "maʼnaviy ekspertiza" dan oʻtkazish amaliyoti joriy etilgani haqida xabarlar tarqalgandi. Adliya vazirligi ushbu holatni oʻrganib chiqib, bunday qaror qonuniy kuchga ega emasligini maʼlum qildi.
Amaldagi qonunchilikka koʻra, jismoniy va yuridik shaxslarning huquqlariga daxl qiluvchi normalar faqat Adliya vazirligida davlat roʻyxatidan oʻtgan taqdirdagina kuchga kiradi.
Vazirlik tomonidan mazkur masala oʻrganilganda unda jismoniy va yuridik shaxslarning huquq va qonuniy manfaatlariga daxl qiluvchi umummajburiy kuchga ega boʻlgan huquqiy normalar belgilanganligi aniqlangan.
"Maʼnaviy ekspertiza" dan oʻtkazish haqidagi hujjat tegishli organlar tomonidan bekor qilingan va ijrodan chiqarilgan.