Sirdaryo hokimi bir kunda pul ajratish boʻyicha uchta farmoyish chiqardi
Aholini asosiy turdagi oziq-ovqat mahsulotlari bilan taʼminlash boʻyicha jamgʻarmaga 1,5 mlrd soʻm berilishi koʻzda tutilgan.
Sirdaryo viloyati hokimi Akmaljon Mahmudaliyev 4 dekabr kuni mablagʻ ajratish boʻyicha uchta farmoyishni imzoladi.
Birinchi farmoyishda aytilishicha, viloyat musiqali drama teatrini taʼmirlash uchun mahalliy byudjetning 3-chorakda rejadan oshirib bajarilgan qismidan 750 mln soʻm beriladi.
Shuningdek, viloyat mahalliy byudjetining 1-chorak daromadlarni rejadan oshirib bajarilgan qismi hisobidan 1500,0 (bir milliard besh yuz) million soʻm mablagʻ ajratiladi.
Pul viloyat hokimligi huzuridagi "Aholini asosiy turdagi oziq-ovqat mahsulotlari bilan taʼminlash zaxira jamgʻarmasi"ga oʻtkazib berish uchun viloyat hokimligiga taqdim etiladi.
Uchinchi farmoyishga koʻra, "Yoshlar daftari"ga kiritilgan yoshlarning ijtimoiy-iqtisodiy muammolarini hal etish maqsadida viloyat mahalliy byudjetining 1-chorak daromadlarni rejadan oshirib bajarilgan qismi hisobidan 250 million soʻm mablagʻ Sardoba tumani hokimligi huzuridagi" Yoshlar daftari"ga kiritilgan yoshlarni qoʻllab-quvvatlash jamgʻarmasiga oʻtkazib berish uchun viloyat hokimligiga ajratiladi.
Avvalroq Qashqadaryoda byudjetdan 28 mlrd soʻm ajratilgandi.
