Yoshlar oʻrtasidagi Osiyo oʻyinlari mezbonligi Bahraynga berildi
2025 yilgi musobaqalar Oʻzbekiston poytaxti Toshkentda boʻlib oʻtishi lozim edi.
Osiyo yoshlar oʻyinlariga mezbonlik qiladigan mamlakat oʻzgardi.
2025 yil Oʻzbekistonda oʻtkazilishi rejalashtirilgan Osiyo yoshlar oʻyinlariga mezbonlik qiladigan davlat nomi almashdi. Bu haqda Osiyo Olimpiya kengashi Instagram tarmogʻidagi sahifasida eeʼlon qilgan.
"Osiyo Olimpiya kengashi Oʻzbekiston mezbonligida Toshkentda oʻtkazilishi kerak boʻlgan Yoshlar oʻrtasidagi 3-Osiyo oʻyinlari 2025 yilda Bahraynda oʻtkazilishini maʼlum qiladi.
Bugun, 2 dekabr kuni oʻtkazilgan tashkilot ijroi qoʻmitasi yigʻilishida bu haqdagi qaror qabul qilindi", - deyiladi Osiyo Olimpiya kengashi rasmiy axborotida.
Oʻzbekistondan nega mezbonlik olib qoʻyilgani haqida izoh berilmagan.
Eslatib oʻtamiz, mazkur sport musobaqalari sabab Toshkentda olimpiya shaharchasi bunyod etilayotgandi.