Oʻzbekiston JSTga aʼzolik boʻyicha Xitoy bilan muzokaralarni yakunladi
Avvalroq boshqa bir yirik davlat - AQSh bilan muzokaralar tugallangandi. Shunday qilib, 22 ta mamlakat bilan muzokaralar oxiriga yetkazildi.
Oʻzbekiston Jahon savdo tashkilotiga aʼzo boʻlib kirish boʻyicha Xitoy bilan ikki tomonlama muzokaralarni yakunladi. Bu haqda Oʻzbekiston Respublikasi Prezidentining Jahon savdo tashkiloti masalalari boʻyicha maxsus vakili Azizbek Oʻrunov maʼlum qildi.
Yaqinda AQSh bilan ham muzokaralar yakunlangan edi. AQSh va Xitoyning Jahon savdo tashkilotidagi nufuzini inobatga oladigan boʻlsak, bu muhim yutuq sanaladi.
"Yil yakuni Oʻzbekistonning Jahon savdo tashkilotiga azoligi boʻyicha juda mazmunli boʻlmokda - ikkita eng yirik global savdo egalari - Amerika va Xitoy bilan muzokalar yakunlandi", deya yozgan Oʻrunov.
Shunday qilib, 22 ta mamlakat bilan muzokaralar oxiriga yetkazildi.
Eslatib oʻtamiz, noyabr oyi boshida AQSh Oʻzbekistonni JSTga kirishini qoʻllab-quvvatlashi maʼlum boʻlgandi. Muzokaralar 14 oy davom etdi.
