Farhod Mannopovning oʻlimida gumonlangan shifokorlar oqlandi
Ular 2 yil muddatga sohada ishlashdan mahrum etilib, turli muddatlarga ozodlikdan cheklash bilan jazolandi.
Bugun jinoyat ishlari boʻyicha Uchtepa tuman sudida bloger Farhod Mannopovning oʻlimi boʻyicha sud ishi tugab, 2 nafar shifokor aybsiz deb topilib, oqlandi.
Star Med Centr xususiy klinikasi otolaringologi A.X. va anesteziolog-reanimatologi J.Q. Jinoyat kodeksining 117-moddasi (xavf ostida qoldirish) 2-qismida nazarda tutilgan jinoyatni sodir etganlikda aybsiz deb topilib, oqlandi.
A.X. va J.Q. Jinoyat kodeksining 116-moddasi (kasb yuzasidan oʻz vazifalarini lozim darajada bajarmaslik) 3-qismida nazarda tutilgan jinoyatni sodir etganlikda aybli deb topilib, ularning har biriga Jinoyat kodeksining 45-moddasini (muayyan huquqdan mahrum qilish) qoʻllagan holda 2 yil tibbiyot sohasida tegishliligi boʻyicha otolaringolog va anesteziolog-reanimatolog vazifalarida ishlash huquqidan mahrum qilib, 5 yil muddatga ozodlikni cheklash jazosi tayinlandi.
J.Q.ga Jinoyat kodeksining 62-moddasi (ushlab turish, qamoqqa olish yoki uy qamogʻi vaqtini hisobga olish qoidalari) tartibida oʻtash uchun 2 yil tibbiyot sohasida anesteziolog-reanimatolog shifokor vazifasida ishlash huquqidan mahrum qilgan holda 3 yil 6 oy 27 kun muddatga ozodlikni cheklash jazosi qoldirilishi belgilandi.
Eslatib oʻtamiz, Farhod Mannopov 2023 yil 5 mart kuni jarrohlik amaliyotidan keyin vafot etgandi.