Tramp Kanada, Meksika va Xitoydan kelayotgan mahsulotlarga qarshi yirik bojlar kiritishini eʼlon qildi
Bu noqonuniy immigratsiya, jinoyatchilik va chegara orqali mamlakatga kirib kelayotgan narkotik moddalarga javob boʻladi, deydi u.
AQShning saylangan prezidenti Donald Tramp oʻz lavozimiga kirishgandan soʻng, Meksika, Kanada va Xitoydan keladigan tovarlarga boj toʻlovlarini oshirishga vaʼda berdi.
Trampning soʻzlariga koʻra, bu noqonuniy immigratsiya, jinoyatchilik va chegara orqali mamlakatga kirib kelayotgan narkotik moddalarga javob boʻladi.
"Men AQShga bemaʼni tarzda ochiq chegaralar orqali kiradigan Meksika va Kanada tovarlariga 25% tarif joriy etish uchun barcha kerakli hujjatlarni imzolayman", deb yozdi u oʻzining Truth Social sahifasida.
" Ushbu tarif giyohvand moddalar, xususan fentanil va barcha noqonuniy xorijliklar mamlakatimizga bostirib kirishni toʻxtatmaguncha amal qiladi", deydi u.
Tramp, shuningdek, Xitoydan keladigan barcha tovarlarga qoʻshimcha 10 foizlik boj joriy etishini aytdi.
"Men Xitoy bilan Amerika Qoʻshma Shtatlariga kelayotgan katta miqdordagi giyohvand moddalar, xususan fentanil haqida koʻp marta gaplashganman, ammo foydasi yoʻq", dedi Tramp.
Uning taʼkidlashicha, Xitoy rasmiylari unga giyohvand moddalar savdogarlariga oʻlim jazosini qoʻllashni vaʼda qilgan, ammo "ular vaʼdalarini bajarmagan va giyohvand moddalar mamlakatga yogʻilgan".
Eslatib oʻtamiz, Tramp 2017-2021 yillardagi hukmronligida ham Xitoy bilan "savdo urushi" olib borgandi.