Bayden Oq Uyda Tramp bilan uchrashdi
Saylangan prezident va isteʼfoga ketayotgan rahbar oʻrtasidagi uchrashuv Amerika siyosiy hayotida uzoq yillik anʼanadir. Biroq Tramp 2020 yilda Baydenni Oq Uyga taklif etmagandi.
AQSh prezidentlik saylovlarida gʻalaba qozongan Donald Tramp Oq uyda amaldagi rahbar Jo Bayden bilan uchrashdi.
Uchrashuv chogʻida Bayden hokimiyatni tinch yoʻl bilan keyingi prezidentga oʻtkazish niyatida ekanini aytdi, Tramp esa jarayon "iloji boricha silliq" oʻtishini bildirgan.
"Janob saylangan va sobiq prezident Donald, tabriklayman! Biz hokimiyatning uzluksiz oʻtishini taʼminlashni istaymiz va sizga kerak boʻlgan hamma narsaga ega boʻlishingiz uchun qoʻlimizdan kelganini qilamiz", — dedi Bayden Trampga.
" Siyosat - bu ayovsiz jarayon va umuman yoqimli joy emas. Ammo bugun u yoqimli tuyulmoqda va men buni juda qadrlayman”, dedi Tramp, shundan soʻng ikki siyosatchi qoʻl siqishdi.
Saylov kampaniyasi vaqtida Tramp va Bayden bir-birlarini qattiq tanqid qilishgan va oxirgi marta iyun oyida boʻlib oʻtgan debatda uchrashishgan. Koʻp oʻtmay, Bayden yoshi va prezident lavozimini egallash qobiliyati bilan bogʻliq xavotirlar tufayli poygadan chiqdi.
Saylangan prezident va isteʼfoga ketayotgan rahbar oʻrtasidagi uchrashuv Amerika siyosiy hayotida uzoq yillik anʼanadir.
Biroq Tramp yutqazgan, lekin tan olishdan bosh tortgan 2020 yilgi prezidentlik saylovlaridan keyin Bayden bilan bunday uchrashuv boʻlib oʻtmadi: oʻsha paytdagi prezident uni Oq Uyga taklif qilishdan bosh tortdi.
Tramp Vashingtonga 2024 yilgi prezidentlik saylovlarida gʻalaba qozonganidan keyin birinchi marta keldi. Oq uyga tashrifidan oldin u Vakillar palatasiga tashrif buyurdi va u yerda Kongress quyi palatasi ustidan nazoratni oʻzida saqlab turgan Respublikachilar partiyasi aʼzolari bilan uchrashdi.
Vakillar palatasiga saylovda ovozlarni sanash hali ham davom etmoqda, biroq unda koʻpchilikni tashkil qilish uchun respublikachilarga atigi ikkita mandat (demokratlar esa oʻnta) yetishmaydi.
Prezident uchun ovoz berish bilan bir vaqtda boʻlib oʻtgan senatorlar saylovi natijasida Respublikachilar partiyasi Amerika parlamentining yuqori palatasini ham nazoratga oldi.