2025 yilgi davlat byudjeti loyihasi muhokamasi boshlandi
Byudjet xarajatlarining 52 foizi ijtimoiy xarajatlarga toʻgʻri kelishi kutilyapti. 2025 yil yakuniga qadar esa 4,3 mln nafar pensiya oluvchilarga oʻrtacha pensiya miqdori 1 645,2 ming soʻmni tashkil etadi.
Oliy Majlis Qonunchilik palatasida 2025 yilgi davlat byudjeti loyihasi muhokamasi boshlandi.
2024 yil 14 noyabr kuni Oliy Majlis Qonunchilik palatasining Byudjet va iqtisodiy masalalar qoʻmitasi tomonidan qonun loyihasi muhokamasiga bagʻishlab yigʻilish oʻtkazilgan.
Ijtimoiy himoyaga ajratilayotgan mablagʻlarning manzilliligini kuchaytirish va samaradorligini taʼminlash, budjet tashkilotlari xodimlarining ish haqi, pensiya va nafaqalarni har yilgi inflyatsiya darajasidan kam boʻlmagan miqdorlarda oshirib borilishi xalq vakillari tomonidan ijobiy baholandi.
Shuningdek, Davlat byudjeti loyihasida kam taʼminlangan oilalarga "Ijtimoiy himoya yagona reyestri" orqali toʻlanadigan nafaqalar boʻyicha amaldagi mezonlarini takomillashtirish va nafaqalarning manzilliligini oshirishga doir ishlarni davom ettirish rejalashtirilmoqda.
Shu bilan birga, Pensiya jamgʻarmasiga pensiya va boshqa toʻlovlarni oʻz vaqtida moliyalashtirishni taʼminlash maqsadida jamgʻarmaning daromadlari va xarajatlari oʻrtasidagi salbiy tafovutni (yetishmovchilikni) qoplash uchun davlat byudjetidan 18,5 trln soʻm transfert mablagʻlari yoʻnaltirilishi koʻzda tutilgan.
2025 yil yakuniga qadar esa 4,3 mln nafar pensiya oluvchilarga oʻrtacha pensiya miqdori 1 645,2 ming soʻmni tashkil etishi kutilmoqda.