Yosh oʻqituvchi va olimlar kengashining birinchi taʼsis yigʻilishi boʻlib oʻtdi
“Toshkent yoshlarni sevadi” oyligi doirasida yosh oʻqituvchi va olimlarga ham alohida eʼtibor qaratilmoqda.
Poytaxtdagi yoshlar markazida oylik doirasida Toshkent shahar yosh oʻqituvchi va olimlar kengashining 1-taʼsis yigʻilishi boʻlib oʻtdi.
Ilk bora tashkil etilgan kengash yigʻilishida 500 nafardan ziyod maktablar, professional va oliy taʼlim muassasalarida faoliyat yuritayotgan yosh oʻqituvchilar, olimlar, tadqiqotchilar hamda tayanch doktorantlar qatnashdi.
Tadbirdan koʻzlangan maqsad — yoshlarning ilm-fanda oʻzini oʻzi boshqarish tizimini rivojlantirish orqali davlat va ilmiy tashkilotlar oʻrtasida ijtimoiy sheriklikni kuchaytirish, ularning ilmiy gʻoya va tashabbuslarini yuzaga chiqarish hamda faoliyatlarini qoʻllab-quvvatlashdan iborat.
Yigʻilishda “Yosh oʻqituvchi va olimlar kengashi” tuzilib, boshqaruv raisi etib iqtisodiyot fanlari boʻyicha falsafa doktori, yosh olim, Toshkent davlat iqtisodiyot universiteti katta oʻqituvchisi Shohrux Boymurodov saylandi.
Shuningdek, kengashning 2025 yilga moʻljallangan ish reja va dastur loyihalari koʻrib chiqildi.
