Ilon Mask hukumat samardorligi boʻyicha departamentni boshqaradi
Yangi maʼmuriyatda Pentagonga Fox News telekanali boshlovchisi Pit Xegset, Markaziy razvedka boshqarmasiga esa Jon Retkliff rahbarlik qiladi.
Donald Tramp davrida milliarder Ilon Mask qaysi lavozimda ishlashi, shuningdek, MRB va mudofaa rahbarlari kim boʻlishi maʼlum qilindi.
AQShning saylangan prezidenti Donald Tramp yangi maʼmuriyatda Pentagon rahbari va Markaziy razvedka boshqarmasi direktori nomzodini ilgari surdi hamda biznesmenlar Ilon Mask va Vivek Ramasvamini hukumat samaradorligi boʻyicha yangi departamentga rahbarlik qilishni taklif qildi.
AQShning yangi mudofaa vaziri armiya faxriysi va Fox News telekanali boshlovchisi Pit Xegset, Markaziy razvedka boshqarmasiga esa Milliy razvedkaning sobiq direktori Jon Retkliff rahbarlik qiladi.
Xegsetning tayinlanishi yangi maʼmuriyatda asosiy va eng kutilganlaridan biri hisoblanadi.
"Pit qattiqqoʻl, aqlli va haqiqatan ham Amerika birinchi oʻrinda turishiga ishonadi", dedi Tramp oʻz bayonotida.
" Pit boshchiligida Amerikaning dushmanlari ogohlantiriladi - bizning armiyamiz yana buyuk boʻladi va Amerika hech qachon chekinmaydi".
Texaslik sobiq kongressmen Retkliff haqida Tramp "u har doim Amerika xalqi bilan haqiqat va halollik tarafdori boʻlgan", dedi.
Oʻz navbatida dunyoning eng boy odami Ilon Mask yangi lavozimi boʻyicha munosabat bildirdi.
"Bu byurokratiya uchun katta xavf" deya yozgan tadbirkor X tarmogʻida.