Andijonda tibbiyot birlashmasi rahbari va kadrlar boʻlimi boshligʻi ushlandi
Ular fuqaroni ishga qabul qilishda 500 AQSh dollari talab qilishgan.
Andijon viloyatida Qoʻrgʻontepa tuman tibbiyot birlashmasi boshligʻi vazifasini bajaruvchisi va kadrlar boʻlimi boshligʻi ushlandi.
Bosh prokuratura huzuridagi Departamentning Qoʻrgʻontepa tumani boʻlimi va IIB xodimlari hamkorligida tezkor tadbir oʻtkazilgan.
Unda tuman tibbiyot birlashmasining kadrlar boʻlimi boshligʻi N.X. fuqaro X.M.ni ushbu tibbiyot birlashmasiga ishga qabul qilish masalasini hal qilib berishi evaziga 500 AQSh dollarini olgan vaqtida ushlangan.
Uning koʻrsatuviga asosan davom etgan tadbirda Qoʻrgʻontepa tuman tibbiyot birlashmasi boshligʻi vazifasini vaqtincha bajaruvchisi Ya.A. fuqaro X.M.ni yuqumli kasalliklar boʻlimiga ishga qabul qilishi evaziga oʻz xizmat xonasida kadrlar boʻlimi boshligʻidan 500 AQSh dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 210-moddasi (pora olish) jinoyat ishi qoʻzgʻatilib, tergov harakatlari oʻtkazilmoqda.
Avvalroq, Fargʻonada korrupsiya boʻyicha mansabdor ushlangandi.