Shavkat Mirziyoyev 5-6 noyabr kunlari Qirgʻizistonga boradi
Prezident Turkiy davlatlar tashkiloti Davlat rahbarlari kengashining navbatdagi majlisida ishtirok etadi.
Shavkat Mirziyoyev Turkiy davlatlar tashkiloti majlisida qatnashadi.
Oʻzbekiston Respublikasi Prezidenti Shavkat Mirziyoyev Qirgʻiz Respublikasi Prezidenti Sadir Japarovning taklifiga binoan Turkiy davlatlar tashkiloti Davlat rahbarlari kengashining navbatdagi majlisida ishtirok etish uchun 5-6 noyabr kunlari amaliy tashrif bilan Bishkek shahrida boʻladi.
Bu galgi sammit kun tartibidan tashkilot doirasidagi koʻp tomonlama hamkorlikni yanada rivojlantirish masalalari oʻrin olgan. Har doimgidek, siyosiy muloqotni mustahkamlash, savdo-iqtisodiy va investitsiyaviy hamkorlikni rivojlantirish, ishbilarmonlik aloqalarini ragʻbatlantirish, madaniy-gumanitar hamkorlikni kengaytirish vazifalari eʼtibor markazida boʻladi.
Yetakchilar xalqaro va mintaqaviy ahamiyatga molik dolzarb masalalar yuzasidan ham fikr almashadilar.
Yigʻilish yakunida qator qoʻshma qaror va hujjatlar, jumladan, mamlakatimiz tashabbusi bilan ishlab chiqilgan Turkiy dunyo Xartiyasi qabul qilinishi koʻzda tutilgan.