Prokuratura Alisher Usmonovga oid tergovni toʻxtatdi

Frankfurt-na-Mayn bosh prokuraturasi rossiyalik milliarder Alisher Usmonovga nisbatan jinoiy pul yuvish boʻyicha tergovni toʻxtatdi. Bu haqda milliarderning advokatlari maʼlumot bergan.

Frankfurt prokurorlari tergovga oid qolgan savollarni federal prokurorlarga topshirdilar, ular esa hali izoh bermadi.

"Biz har doim mijozimizning aybsizligini taʼkidlab kelganmiz", dedi advokatlar Uve Lembruk, doktor Markus Gotsens. Ular bu qarorni Usmonov obroʻsini himoya qilish uchun muhim qadam deb atadi.

Advokatlarning soʻzlariga koʻra, ikki yil davomida tergov tadbirkorga qarshi dalil toʻplay olmagan.

2022 yil sentabrida Usmonovning Bavariyadagi villasida tintuvlar oʻtkazildi. Frankfurt bosh prokuraturasi u 2017-2022 yillar oraligʻida millionlab yevro daromad kelib chiqishini yashirish uchun "kompaniyalar va korporatsiyalarning keng va murakkab tarmogʻidan" foydalanganlikda gumonlanayotganini aytdi. Keyinroq sud tintuvlarni noqonuniy deb topdi va olib qoʻyilgan barcha ashyolarni qaytarib berishga qaror qildi.