Oʻzbekistonda yer va mol-mulk soligʻi oshishi kutilmoqda
Yuridik va jismoniy shaxslardan olinadigan yer soligʻining bazaviy stavkalari oʻrtacha 10 foizga indeksatsiya qilinmoqda.
Oʻzbekistonda mol-mulk soligʻi miqdorlari oshishi kutilmoqda.
Iqtisodiyot va moliya vazirligi 2025 yil uchun davlat byudjeti hamda soliq siyosati loyihasi (Byudjetnoma)ni eʼlon qilindi. Byudjetnoma 2025-2027 yillarga moʻljallangan Fiskal strategiya asosida ishlab chiqilgan.
Mazkur hujjat loyihasiga koʻra, 2025 yil 1 yanvardan boshlab mahalliy byudjet daromadlarini oshirish maqsadida yuridik va jismoniy shaxslarning turar va noturar koʻchmas mulk obʼektlariga solinadigan mol-mulk soligʻi stavkalari 10 foizga indeksatsiya qilinmoqda.
Bunda Qoraqalpogʻiston Respublikasi Joʻqorgʻi Kengesi va xalq deputatlari viloyatlar Kengashlari tomonidan noturar koʻchmas mulk obʼektlari uchun belgilangan eng kam qiymatga tumanlarning iqtisodiy rivojlanishiga qarab 0,5 gacha boʻlgan kamaytiruvchi koyeffitsiyent qoʻllash huquqi saqlab qolinadi.
Shu bilan birgalikda yuridik va jismoniy shaxslardan olinadigan yer soligʻining bazaviy stavkalari ham oʻrtacha 10 foizga indeksatsiya qilinmoqda.
Bundan tashqari tarkibida shakar va shirinlashtiruvchi, xoʻshboʻylantiruvchi moddalar boʻlgan ichimliklarga yagona aksiz soligʻi solish taklif etilmoqda. Tamaki, alkogol, neft mahsulotlari, suv resurslaridan foydalanganlik uchun soliq stavkalari indeksatsiya qilinmoqda. Mobil aloqa xizmatlari uchun aksiz soligʻi bekor qilinadi.
Shuningdek, hujjatga koʻra, yaqin istiqbolda Oʻzbekiston YaIMsini 160 mlrd dollar (aholi jon boshiga 4 ming dollardan) yetkazish reja qilinmoqda. Oʻrta muddatga moʻljallangan davlat qarzini boshqarish strategiyasini amalga oshirish orqali davlat qarzining YaIMga nisbatini 50 foizdan oshmasligini taʼminlash moʻljallanmoqda.
