Meksikada narkokartel va politsiya toʻqnashuvida 19 kishi halok boʻldi

Meksikaning Sinaloa shtatida narkokartel va mahalliy huquq-tartibot idoralari oʻrtasidagi toʻqnashuvlar natijasida 19 kishi halok boʻldi. Bu haqda Meksika Milliy mudofaa kotibiyati (SEDENA) xabar berdi.

Departament maʼlumotlariga koʻra, mahalliy huquq-tartibot idoralari operatsiya davomida Meksikaning Tinch okeani janubiy qirgʻogʻi karteli fraksiyasiga aloqador boʻlgan yacheyka rahbari Edvin Antonioni hibsga olgan. Operatsiya davomida politsiyaga narkotik kartelining 30 dan ortiq aʼzosi hujum qilgan.

"Hodisa davomida yuqorida tilga olingan 30 dan ortiq kishining harbiy xizmatchilarga hujumi qayd etildi... Natijada 19 nafar hujumchi oʻldirildi, qolganlari qochib ketdi", deyiladi xabarda.

Bayonotda shuningdek, giyohvand moddalar karteli boshligʻini qoʻlga olish chogʻida politsiya tomonidan toʻrtta pulemyot, bitta Barrett M82 yirik kalibrli snayper miltigʻi va yettita avtomashina musodara qilingani qayd etilgan.

Meksikaning Sinaloa shtati hukumati kartellar oʻrtasidagi koʻcha jangi va mintaqadagi xavfsizlik amaliyotlari tufayli sentabr oyida mamlakat mustaqillik kunlarini nishonlashning barcha tadbirlarini bekor qilgandi. Mahalliy ommaviy axborot vositalarining xabar berishicha, Sinaloaning turli hududlarida mahalliy kartelning ikki qanoti – narkobaron Shorti bolalari boshchiligidagi Los Chapitos va yaqinda hibsga olingan Ismoil Zambada boshchiligidagi Los-Mayos jangarilari oʻrtasida toʻqnashuvlar boʻlib oʻtgan.

Sinaloada tartibni saqlash uchun katta armiya kontingenti va milliy gvardiya boʻlinmalari joylashtirildi. Meksika mudofaa vaziri Luia Kresensio Sandovalning soʻzlariga koʻra, Kuliakan shtati poytaxtida tartibni saqlash bilan turli qurolli kuchlarning 2,2 ming xodimi faoliyat olib bormoqda.

Meksikaning Sinaloa shtatida jangarilar va xavfsizlik kuchlari oʻrtasidagi toʻqnashuvlar natijasida jami 30 dan ortiq odam, jumladan, ikki harbiy xizmatchi halok boʻldi, 30 kishi hibsga olindi.