Qirgʻizistonda qor koʻchkisi tagida qolib ketgan olti jasad topildi
Jasadlar Jalolobod viloyatining Chotqol tumanidagi Oqsoy vodiysidan topilgan.
Qutqaruvchilar Qirgʻiziston togʻlarida qor koʻchkisi ostida qolgan olti kishining jasadini topdi. Bu haqda mamlakat Favqulodda vaziyatlar vazirligi xabar berdi.
Birinchi qidiruv guruhi uchta qurbonning jasadini topdi; keyinroq qor koʻchkisi boʻlgan Kumbel hududidan yana uchta jasad topilgan.
Halok boʻlganlarning jasadlari qarindoshlariga topshiriladi.
Qidiruv ishlariga Qirgʻiziston Favqulodda vaziyatlar vazirligining 16 nafar qutqaruvchisi va Airbus H 145 vertolyoti jalb qilingan.
Jasadlar Jalolobod viloyatining Chotqol tumanida Oqsoy vodiysida qor koʻchkisi ostida gʻoyib boʻlgan fuqarolarni qidirish ishlari doirasida aniqlangan. 9 oktabr kuni 14 kishidan iborat guruh togʻlarga chiqqan. Qidiruv davomida sakkiz kishi topilgan. Ularning xabar berishicha, 14-oktabr kuni kechqurun qor koʻchkisi olti kishi va 16 otni bosib ketgan.