Shavkat Mirziyoyev Ozarbayjon Tashqi razvedka xizmati rahbarini qabul qildi
Terrorizm, ekstremizm va radikalizm, kiberjinoyatchilik hamda boshqa zamonaviy xavflarga qarshi kurashish boʻyicha hamkorlik muhimligi taʼkidlandi.
Oʻzbekiston Prezidenti Shavkat Mirziyoyev 17 oktabr kuni mamlakatimizda amaliy tashrif bilan boʻlib turgan Ozarbayjon Respublikasi Tashqi razvedka xizmati rahbari Orxon Sultonovni qabul qildi.
Uchrashuv avvalida Ozarbayjon idorasi boshligʻi davlat rahbariga Ozarbayjon Prezidenti Ilhom Aliyevning samimiy salomi va tilaklarini yetkazdi.
Oʻzbekiston-Ozarbayjon ittifoqchilik va koʻp qirrali hamkorlik munosabatlarini oliy darajadagi kelishuvlarni amalga oshirish doirasida yanada chuqurlashtirish masalalari koʻrib chiqildi.
Turli darajalarda faol muloqotlar va samarali almashinuvlar davom etayotgani, oʻzaro savdo va investitsiyalar koʻrsatkichlari barqaror oʻsayotgani, tomonlar kooperatsiya loyihalarini qoʻllab-quvvatlash va jadallashtirish, madaniy-gumanitar tadbirlarni oʻtkazish boʻyicha chora-tadbirlar koʻrayotgani alohida mamnuniyat bilan qayd etildi.
Terrorizm, ekstremizm va radikalizm, kiberjinoyatchilik hamda xavfsizlikka tahdid solayotgan boshqa zamonaviy xavflarga qarshi kurashish boʻyicha maxsus xizmatlarning yaqin idoralararo hamkorligini mustahkamlash va samarali muvofiqlashtirish muhimligi taʼkidlandi.
Shuningdek, Afgʻonistonning iqtisodiy rivojlanishiga koʻmaklashishga qaratilgan amaliy hamkorlikni kengaytirish masalalari ham muhokama qilindi, deyiladi Oʻzbekiston prezidenti matbuot xizmati xabarida.