Nikaragua Oʻzbekistonga birinchi elchisini tayinladi
Tatyana Daniyela Garsiya Silva Nikaraguaning Oʻzbekistondagi diplomatik missiyasiga rahbarlik qiladi. Ikki davlat oʻrtasida 2007 yilda aloqalar oʻrnatilgandi.
Nikaragua davlati Oʻzbekistonga birinchi elchisini tayinladi. Bu haqda Oʻzbekiston tashqi ishlar vaziri Baxtiyor Saidov maʼlum qildi.
"Nikaraguaning Oʻzbekistondagi yangi tayinlangan va birinchi Elchisi Tatyana Daniyela Garsiya Silva xonim bilan uchrashdik. Ikki tomonlama munosabatlarimizda foydalanilmayotgan ulkan imkoniyatlarni oʻrganish mexanizmlarini muhokama qildik. Tashqi ishlar vazirliklari aloqalarimizda, ayniqsa, iqtisodiy jihatdan aniq natijalarga erishishda lokomotiv vazifasini bajarishlari lozim", deya yozgan Oʻzbekiston TIV rahbari.
Baxtiyor Saidov sentabr oyida AQShda Nikaragua tashqi ishlar vaziri bilan uchrashib, oʻzaro aloqalarni faollashtirishga kelishib olgandi.
Eslatib oʻtamiz, Oʻzbekiston va Nikaragua oʻrtasida 2007 yilda diplomatik aloqalar oʻrnatilgan.