Ilon Mask uch oyda Tramp kampaniyasi uchun qariyb 75 million dollar hayriya qildi
Dunyoning eng boy odami boʻlgan milliarder soʻnggi paytlarda ochiqdan ochiq Trampni qoʻllab-quvvatlamoqda.
Amerikalik tadbirkor Ilon Mask uch oy davomida AQSh prezidentligiga nomzod Donald Tramp saylovoldi kampaniyasini qoʻllab-quvvatlash uchun deyarli 75 million dollar xayriya qildi. Bu haqda AQSh Federal saylov komissiyasi (FEC) xabar bermoqda.
FEC maʼlumotlariga koʻra, Maskning iyuldan sentabrgacha boʻlgan umumiy xayriyalari 74,95 million dollarni tashkil qilgan. 24 oktabr kuni saylov komissiyasiga yana bir hisobot taqdim etiladi, u 1 oktabrdan 16 oktabrgacha boʻlgan davrni qamrab oladi.
Avvalroq Mask Trampni "demokratiyani qutqara oladigan yagona shaxs" deb atagan edi.
Oktabr oyi boshida Pensilvaniyadagi mitinglardan birida Mask Tramp yonida ishtirok etdi.
U shuningdek, agar Tramp yutqazsa, boʻlajak prezidentlik poygasi oxirgisi boʻlishi mumkinligini aytdi. Maskka koʻra, agar saylovda demokrat nomzod Kamala Xarris gʻalaba qozonsa, migrantlar ovozi yordamida uning partiyasi yetakchilik qiladi.