Oybek Elmuratov Farmatsevtika tarmogʻini rivojlantirish agentligi direktori oʻrinbosari etib tayinlandi
U shu vaqtga qadar Xorijiy investitsiyalarni jalb etish agentligi direktori vazifasini bajaruvchi boʻlib ishlab kelayotgandi.
Vazirlar Mahkamasining qaroriga muvofiq Elmuratov Oybek Umurzakovich Sogʻliqni saqlash vazirligi huzuridagi Farmatsevtika tarmogʻini rivojlantirish agentligi direktori oʻrinbosari etib tayinlandi. Bu haqda SSV matbuot xizmati xabar berdi.
Oybek Elmuratov 1999 yilda Toshkent moliya institutini tamomlab, mehnat faoliyatini “Oʻzmilliybank” Loyihani moliyalashtirish markazi mutaxassisi sifatida boshlagan.
Keyinchalik Moliya vazirligida boʻlim boshligʻi oʻrinbosari, ushbu vazirlikning Yoʻl jamgʻarmasi boshligʻi oʻrinbosari, BMTning Oʻzbekistondagi loyiha menejeri, “Oʻzkimyosanoat” davlat aksiyadorlik kompaniyasi departamenti boshligʻi, Investitsiyalar va tashqi savdo vazirligida boshqarma boshligʻi kabi qator masʼul vazifalarda mehnat qilgan.
Oybek Elmuratov tayinlovga qadar Xorijiy investitsiyalarni jalb etish agentligi direktori vazifasini bajaruvchi lavozimida ishlab kelayotgan edi.