Sogʻliqni saqlash vazirligi ogohlantirildi
Bunga MAGNE B6, IMUDON, SMEKTA, DUSPATALIN, ELEVIT kabi dori vositalarining kontrafakt nusxalari davlat roʻyxatidan oʻtkazilgani sabab boʻlgan.
Intelektual mulk agentligi kontrafakt dori vositalari sabab Sogʻliqni saqlash vazirligini ogohlantirdi.
Qonunchilik hujjatlari talablariga koʻra dori vositalari, tibbiy buyumlar va tibbiy texnikalarni davlat roʻyxatidan oʻtkazilishida intellektual mulk huquqlariga qatʼiy rioya etilishi kerak.
Adliya vazirligi tomonidan oʻtkazilgan oʻrganishlar davomida 2023 yilda 21 ta holatda, 2024 yilning oʻtgan davrida 16 ta holatda dori vositalari intellektual mulk huquqlariga rioya qilmagan holda davlat roʻyxatiga olinganligi aniqlandi.
Jumladan, isteʼmolchilarga yaxshi tanish boʻlgan MAGNE B6, IMUDON, SMEKTA, DUSPATALIN, ELEVIT kabi tovar belgilari ostida ishlab chiqariladigan dori vositalarining kontrafakt nusxalari Magne B6, Nest Imudon, Smecta, Grand Imudon, MER DUSPATANIM, ELEMALVIT koʻrinishida turli farmatsevtika korxonalari nomiga intellektual mulk huquqlariga rioya qilmagan holda davlat roʻyxatidan oʻtkazilgan.
Shu sababli Sogʻliqni saqlash vazirligiga ogohnoma kiritilgan. Unda vazirlik dori vositalari, tibbiy buyumlar va tibbiy texnikalarni davlat roʻyxatdan oʻtkazilishida qonunchilik hujjatlari talablari buzilishini oldini olish boʻyicha kompleks chora-tadbirlar koʻrish lozimligi, bunday holatlar takroran sodir etilganda qonunchilikda belgilangan jazo choralari qoʻllanilishi haqida ogohlantirildi.
"Dori vositalari va farmatsevtika faoliyati toʻgʻrisida"gi Qonunga asosan dori vositalarini, tibbiy buyumlarni va tibbiy texnikani davlat roʻyxatidan oʻtkazish Sogʻliqni saqlash vazirligi tomonidan amalga oshiriladi hamda qalbakilashtirilgan va Oʻzbekiston Respublikasida roʻyxatdan oʻtkazilgan dori vositalarining gʻayriqonuniy nusxalarini ishlab chiqarish taqiqlanadi.