Oʻzbekistonning oltin-valyuta zaxiralari hajmi 41 mlrd dollardan oshdi
Bu 2013 yildan beri yuritiladigan statistik maʼlumotlar uchun navbatdagi rekord sanaladi.
Oʻzbekiston oltin-valyuta zaxiralari rekord darajaga yetdi va 41 mlrd dollardan oshdi. Bu haqda Markaziy bank maʼlumot berdi.
1 oktabr holatiga koʻra, Oʻzbekistonning rasmiy zaxira aktivlari sentabr oyida 1,99 milliard dollarga oshgan holda 41,14 milliard dollarni (+5 foiz) tashkil etmoqda.
Bu 2013 yildan beri yuritiladigan statistik maʼlumotlarning butun davri uchun navbatdagi rekord koʻrsatkich hisoblanadi. Oʻzbekiston yalpi xalqaro zaxiralari 2024 yilning sentabr oyida 1,99 mlrd. dollarga oshdi, bunda oltin narxining 2524,15 dollardan 2650,15 dollargacha koʻtarilishining taʼsiri +1,51 mlrd. dollarni tashkil etdi.
Soʻnggi oʻn yil ichida oltin zaxirasi rekord darajada koʻpaygan davlatlar orasida Rossiya yetakchi (+ 1,2 ming tonna). Keyingi oʻrinlarda Xitoy va Turkiya bormoqda.
Jahondagi umumiy oltin zaxirasi boʻyicha esa AQSh va Germaniya yetakchi. AQSh oltin zaxirasi 8,1 ming tonnadan oshadi. Germaniyada bu koʻrsatkich 3,35 ming tonnani tashkil qiladi.